हिमपहिरोमा परी मृत्यु हुनेको संख्या २९ पुग्यो

###

हेलिकोप्टरबाट देखियो शवैशव, गाडिएका शवहरु निकाल्न हम्मेहम्मे ।
मुस्ताङ/म्याग्दी आश्विन ३० । उच्च हिमाली क्षेत्र मुस्ताङ र मनाङमा भएको भारी हिमपातबाट स्वेदेशी र विदेशी गरी अहिलेसम्म २९ जनाले ज्यान गुमाएका छन् । आज बिहान थप पाँच वटा शव भेटिएपछि मर्नेको संख्या त्यति पुगेको हो ।

आठ दिन अघि भारतको अन्दमान निकोबार समुन्द्री आंधी हुडहुड प्रभावले हिमाली क्षेत्रमा भारी हिमपात भएको हो । अहिलेसम्म पनि सो क्षेत्रमा व्यापक हिमपात भैरहेकाले उद्धारमा निकै कठिनाई भएको बताइएको छ ।
हिमपात भएका क्षेत्रमा हेकिप्टरबाट थुप्रै शवहरु देखिएको तर मौसमका कारण उद्धार गर्न नसकिएको सुरक्षा निकायले जनाएका छन् । हावाहुरी र हिंउ पर्ने क्रम नरोकिएकाले हिंउमा गाडिएका शवहरु निकाल्न सकिएको छैन ।
मुस्ताङमा अन्नपूर्ण सर्किटमा गएकाहरु थोराङपास पार गरेर मुक्तिनाथतर्पm झर्ने क्रममा ५ हजार मिटरको डमक्याम भन्ने स्थानमा आइपुग्दा हिमपातमा परेका थिए । चिसोले कठ्याङग्रिएर उनीहरुको मृत्यु भएको बताइएको छ । उता, मुस्ताङबाट १९ जना घाइतेलाई उद्धार गरिएको छ ।
नेपाली सेनाले हेलिकप्टरबाट घाइतेलाई पोखरा र काठमाडौं ल्याएको मुस्ताङ जिल्ला प्रशासन कार्यालयले जनाएको छ । यस्तै, मनाङको नार गाविसमा चौंरी चराउन गएकाहरुको पनि मृत्यु भएको मनाङ जिल्ला प्रशासन कार्यालयले जनाएको छ ।
अन्नपूर्ण सर्किटमा गएका १ सय ५० जनाको खोजी भइरहेको नेपाली सेनाको सैनिक जनसम्पर्क निर्देशनालयले जनाएको छ । अहिलेसम्म सेनाले पाँच जर्मन, पाँच पोलिस र चार इजरायलीको उद्धार गरेको छ ।
काठमाडौंका एक्मी इञ्जिनियरीङ कलेजका दश जना विद्यार्थीको पनि उद्वार गरिएको छ । सीमा प्रहरी कार्यालय हुम्दीले पूर्वमन्त्री सुरेश मल्लका छोरीसहितको टोलीलाई उद्वार गरेको हो । यता, म्याग्दीको मुदी गाविसमा पर्ने धौलागिरी बेस क्याम्पमा आएको हिउँ पहिरोमा परी पाँच जना वेपत्ता भएका छन् ।
हिजो बेलुकी हुरीसहित आएको हिउंँ पहिरोमा परि स्लोभियाका दुई पर्यटक सहित भोजपुरका गोपाल राई, ओखलढुंगाका भोजकुमार राई र सोलुखुम्बुका दोर्जे शेर्पा बेपत्ता भएका छन् ।
उनीहरुको खोजी कार्य जारी रहेको स्थानीय प्रशासनले जनाएको छ । नेपाल पर्वतारोहण संघको टोलीले स्लोनोभियाका आठ, जर्मनीका दुई र १० जना नेपालीलाई धौलागिरी बेस क्याम्पबाट उद्धार गरेको छ ।

##