ट्रकले बसलाई ठक्कर दिँदा ज्यान गुमाउनेको संख्या ६ पुग्यो

###

बारा : पथलैया–हेटौडा सडकखण्ड अन्र्तगत बाराको अमलेखगञ्ज–८ मा बुधवार बिहान ट्रकले बसलाई ठक्कर दिँदा ज्यान गुमाउनेको संख्या ६ पुगेको छ । दुर्घटनामा पाँचजनाको घटनास्थलमै र एक जनाको उपचारका क्रममा ज्यान गएको हो ।

दुर्घटनामा गम्भीर घाइते बाराको खुटुवा प्रसौनी–४ का २२ वर्षीय राजेश साहको उपचारका क्रममा नारायाणी उपक्षेत्रीय अस्पतालमा मृत्यु भएको मध्य क्षेत्रीय ट्राफिक प्रहरी कार्यलयले जनाएको छ । कार्यलयका अनुसार घटनास्थलमा मृत्यु भएका तीन पुरुष र दुई महिलाको सनाखत हुन सकेको छैन ।

दुर्घटनामा घाइते अधिकांश यात्रुको वीरगञ्ज, हेटौडा र भरतपुरमा उपचार भइरहेको छ । बस चालकसहित १० यात्रुको अवस्था गम्भीर रहेको सिमरास्थित इलाका प्रहरी कार्यलयका प्रहरी निरीक्षक कुमारबिक्रम थापाले जानकारी दिए ।

वीरगञ्जबाट नारायणघाट जाँदै गरेको ना४ख १५४४ नम्बरको बसलाई बिपरित दिशाबाट आईरहेको ना३ख ६२८५ नम्बरको ट्रकले ठक्कर दिएपछि दुर्घटना भएको हो । ना२ख ८७११ नम्बरको ट्यांकरलाई ओभरटेक गर्ने क्रममा ठोक्किएर अनियन्त्रित भएपछि ट्रकले विपरित दिशाको बसलाई ठक्कर दिएको प्रहरीको भनाइ छ । बसलाई ठक्कर दिएर तीव्रगतिमा गुडेको ट्रक अनियन्त्रित भई राजमार्ग छेउको जंगलमा पुगेको थियो ।

प्रहरीले ट्रक र ट्यांकरका चालकलाई प्रहरीले नियन्त्रणमा लिएको छ । राजमार्गबीचमै दुर्घटना भएकाले सवारी आवागमन रोकिएपछि बस हटाए यातायात सुचारु गरिएको प्रहरी निरीक्षक थापाले जानकारी दिए।

##