राजगुठीका जमिन निजी प्रयोगमा !

###

पर्वत, साउन २२ – पर्वतमा रहेका अधिकांश गुठीको जमिन ब्यक्तिगत रुपमा उपभोग र किनबेच भएको पाइएको छ । राजगुठीको जमिन पनि ब्यक्तिले रैतानीमा परिणत गरेर किनबेच गर्दै आएको त्यसको उपभोग ब्यक्तिले गर्दै आएको पाइएको हो ।

गुठी जग्गा अध्ययन अनुसन्धान सम्बन्धी कार्यदलले आयोजना गरेको एक अन्तरक्रिया कार्यक्रममा राज गुठीको जमिन ब्यक्तिले नै उपभोग गर्ने र किनबेच गर्दै आएको विवरण सार्वजनिक गरिएको छ । निजी गुठीको पनि उपभोग ब्यक्तिले नै गरेको पाइएको छ । पर्वतमा ४ वटा राजगुठी र ९० हाराहारीमा निजी गुठी रहेका छन ।
जिल्ला मालपोत कार्यालय पर्वतले दिएको जानकारी अनुसार राजगुठीमा रहेको २ हजार ३ सय ७२ रोपनी जमिन मध्ये अधिकांश जमिन ब्यक्तिले रैतानीमा परिणत गरेर किनबेच र बैंकबाट धितोसमेत लिदै आएका छन ।
कुस्मा नगरपालिकाको शिवालयमा रहेको मुक्तिनाथ जाने आउनेलाई बासपानी दिने पौवा गुठी, कटुवाचौपारीको ठाँटी गुठी, माझफाँट वारी बेनीको म्याग्दी बेनी शिवालय गुठी र नाङलीबाङ गाविसमा रहेको शिवजी गुठीको जमिन मध्ये धेरै जमिन ब्यक्तिले रैतानी परिणत गरेको पाइएको छ ।
यस्तो जमिनमा जग्गाधनीको रुपमा ब्यक्तिको नाम रहेको ाखिएको मालपोत अधिकृत सुरणप्रसाद शर्माले बताउनुभयो । लालपुर्जामा गुठीको जमिन भनिएपनि मोहीको रुपमा राख्नुपर्ने राख्नुपर्नेमा जग्गा धनीको रुपमा राखेका कारण किनबेच देखि बैंकबाट धितोको रुपमा समेत प्रयोग भइरहेको छ ।
यस्तो जमिन सरकारले लिन तथा ब्यबस्थापन गर्न अब जटिल भैसकेको बताइएको छ । ‘रैतानीमा परिणत भइसकेको जमिन सरकारले खोस्न गाह्रो छ’ जिल्ला मालपोत कार्यालय पर्वतका प्रमुख पौडेलले भन्नुभयो, ‘अहिले भने रैतानीमा परिणत गर्न रोक लगाइएको छ ।’ गुठीको जमिनको मूल्यांकन गरी त्यस बराबरको रकम जम्मा गरेपछि रैतानीमा परिणत गर्ने ब्यवस्था थियो ।

##