दशैंलाई लक्षित गरी ट्रयाक खोल्ने काम भदौ २५ मा सकिने

###

पहिरोले अवरुद्ध अरनिको राजमार्ग खुलाउन वैकल्पिक ट्रयाक निर्माण कार्य सुरु, दशैंलाई लक्षित गरी ट्रयाक खोल्ने काम भदौ २५ मा सकिने

सिन्धुपाल्चोकको मांखा र राम्चे गाउँ विकास समितिको सीमामा गएको पहिरोले अरनिको राजमार्ग अवरुद्ध भएपछि वैकल्पिक ट्रयाक निर्माण सुरु भएको छ । आजबाट नेपाली सेनाले अवरुद्ध राजमार्ग सुचारु गराउन सुनकोशी नदी पारीबाट ट्रयाक खोल्ने काम सुरु गरेको हो ।
दशैलाई लक्षित गरी सुरु गरिएको ट्रयाक खोल्ने काम भदौ २५ गते सम्म सम्पन्न गरिने सेनाले जनाएको छ । पहिरोले राजमार्ग अवरुद्ध हुँदा नेपाल चीनबीच हुने व्यापार ठप्प छ । जसकारण दैनिक करोडौं राजश्व संकलन हुन सकेको छैन । सडक अवरुद्ध भएपछि बाह्रविसे तातोपानीलगायतका बजारमा दैनिक उपभोग्य सामग्रीकै अभाव हुन थालेको छ ।
उता, नेपाली सेनाले थुनिएको स्थानमा थप विस्फोट गराई पानी खोल्ने क्रमलाई पनि तीव्रता दिएको छ । सेनाले आज पनि प्रभावित क्षेत्रमा थप विस्फोट गराएको थियो । पहिरो गएको स्थलमा ठुल्ठुला चट्टान रहेकाले हटाउन समस्या भएको सेनाले जनाएको छ । एक्साभेटर र डोजरको सहायतामा पुरिएका घरहरु र सडक खोल्ने क्रम पनि जारी राखिएको छ । पहिरो र डुवानका पीडितहरुलाई राहत उपलब्ध गराउन स्थानीय प्रशासन जुटेको छ । राजमार्ग आसपासका बजार क्षेत्रमा सामान्य चहलपहल बढे पनि पसल तथा व्यापर भने सुचारु हुन सकेको छैन् ।

##