कोरियाली राजदूत पनि वाग्मती सफाइमा

###

वाग्मती नदी सफाइ अभियानले ६५औँ सातासम्म पनि निरन्तरता पाएको छ ।
सरकारका मुख्य सचिव लीलामणि पौड्यालको नेतृत्वमा विज्ञान प्रविधि तथा वातावरण मन्त्रालयका सचिव डा कृष्णचन्द्र पौडेल, नेपालका लागि कोरियाली राजदूत चोइ योङ जिन र कोरियाली सहयोग नियोगका नेपाल प्रतिनिधि हाइङ लान जोसहित ६० भन्दा बढी कोरियाली नागरिक र विभिन्न सामाजिक संघसंस्थाका पदाधिकारीहरु २४ साउन, शनिबार वाग्मती नदीको सरसफाइमा सहभागी भएका छन् ।
शनिबारमात्रै सङ्कलित ४६ टन फोहर काठमाडौँ महानगरपालिकाले व्यवस्थापन गरेको नेपाल उद्योग वाणिज्य महासङ्घका केन्द्रीय सदस्य राजकुमार भट्टराईले जानकारी दिए ।
अभियानकै क्रममा टेकु आसपासमा २०० वृक्ष रोपणसमेत गरिएको छ । काठमाडौँ उपत्यका विभिन्न कलेजका विद्यार्थीहरुको पनि अभियानमा सहभागिता रहेको समाजशास्त्री पुरुषोत्तम कँडेलले जानकारी दिए ।
अव्यवस्थित फोहरमैला तथा ढल निकासका कारण वाग्मती नदी जैविक तथा वातावरणीय जोखिममा पर्दै गएकाले अभियानलाई निरन्तता दिइएको हो ।
प्रत्येक साता शनिबार चलाइएको अभियानले जनतामा वाग्मती सफाइप्रति सकारात्मक सन्देश गएको मुख्य सचिव पौड्यालले बताएका छन्् ।

##